In nomine Domini. Amen. Anno ejusdem M^o CC^o nonagesimo tercio, die jovis post festum beati Hylarii, indictione VII, per presens publicum instrumentum cunctis appareat evidenter quod in nostra infrascriptorum notariorum, videlicet mei Johannis Baconerii de Lugduno et Andree de Kadrellis, clericorum, auctoritate apostolica publicorum notariorum, presencia, et testium subscriptorum, frater Robertus de Chaili, monachus Cluniacensis, existens in capitulo Cluniacensi, unacum reverendo patre domino G[uillelmo,] Dei gratia abbate dicti loci, pluribusque prioribus dicti ordinis presentibus, non habens tunc temporis, ut dicebat, certam in ordine mansionem, idem frater Robertus eumdem dominum abbatem humiliter requisivit, ut ipse dominus abbas eidem fratri R. in aliquo prioratu seu domo ordinis Cluniacensis assignaret mansionem. Quod dictus abbas, presente in dicto capitulo venerabili et religioso viro fratre Symone de Armentariis, priore Karitatensi, ordinis Cluniacensis, assignando eidem R. mansionem, talibus seu consimilibus verbis usus fuit: «Et nos vobis in prioratu Karitatensi concedimus mansionem; injungentes ac precipientes priori Karitatensi, hic presenti, quod vos secum recipiat in prioratu predicto et fraterna pertractet in Domino karitate». Quod prior de Karitate statim dictum fratrem Robertum recepit in suum mansionarium apud Karitatem commoraturum, de mandato dicti domini abbatis et ad mandatum ipsius humiliter et gratanter. Actum in capitulo Cluniacensi predicto, existentibus in eodem capitulo religiosis viris priore majore et conventu Cluniacensi, et discretis viris magistro Theobaldo de Camera (?), canonico Matisconensi, magistro Stephano de Sancto Poncio, cancellario domini regis in ballivia Matisconensi, magistro Gaufrido de Gyemo, et magistro Durando de Marcyniaco, clericis, et pluribus aliis ad hoc rogatis. (Suivent les seings et les formules des notaires)