Universis presentes litteras inspecturis, frater Guillelmus, miseratione divina Cluniacensis ecclesie minister humilis, salutem in Domino. Quanto studio et quam ferventi desiderio serenissimus princeps noster et dominus Philippus, Dei gratia Francorum rex, et incliti progenitores ejusdem, deffensionis clipei et salutis, causam illius, qui pro salute populi in ara crucis se ipsum obtulit hostiam Deo patri, susceperint, etc. ... ut per hec, divino adjutorio mediante, in dicto regno et sub ipsius regimine, more solito, habeantur tempora pacifica et transquilla; eapropter deliberatione provida cum ... abbatibus et prioribus antedictis ad supportanda per dictum principem nostrum levius supradicta, duximus ordinandum quod unaqueque ordinis nostri persona, que olim decimam solvere consuevit, in valore et quantitate decime juxta declarationem et taxationem hactenus habitas per Romanam ecclesiam vel per legatum ejusdem, de redditibus dicti ordinis in regno Francie constitutis eidem domino regi ad biennium subveniat gratiose et per aliquos de dicto ordine collectores, per nos et non per alium assumendos, dicta quantitas levabitur et in qualibet dicti ordinis cameraria dicti domini regis gentibus per eosdem collectores deliberabitur et tradetur ad terminos infrascriptos, videlicet pro primo anno medietas ipsius quantitatis die dominica qua cantatur Letare Hierusalem et alia medietas in subsequenti festo beati Michaelis. In secundo anno et pro secundo anno fiet solutio et satisfactio eodem modo et eisdem festivitatibus et terminis quibus supra. Et si aliquis de dicto ordine aliquo de statutis terminis in toto vel in parte deficeret in solvendo, ad ipsum defficientem, non ad nos, non ad quemquam alium de dicto ordine per dictum dominum regem vel suos pro defectu solutionis hujusmodi haberetur recursus. Si tamen Romana ecclesia citra et infra dictum biennium eidem domino regi vel alii cuicumque decimam a nobis et a personis dicti ordinis exigendam concederet aut levandam vel fuerit jam concessa aut sibimet eadem ecclesia pro supportandis vel faciendis aliquibus retineret vel per eam fuerit jam retenta, nos et persone predicte nullatenus teneremur ad quantitatem predictam. Id idem esset et fieret, si majus quam sit decima eadem ecclesia nobis et dicto ordini citra dictum biennium imponeret, aut jam sic impositum in presenti. Quodsi, citra dictum biennium, minorem partem quam sit decima supradicta imponeret et jam nobis et dicto ordini imposita reperiatur a casu, illud sic impositum deduceretur de quantitate predicta. Si vero citra biennium antedictum fieret (quod concedat Altissimus!) pax et concordia et cessaret impugnatio dicti regni, cessaret extunc similiter solutio quantitatis predicte, nec ad ipsam nos et persone dicti ordinis aliquatenus teneremur. Et si interim treuga iniretur, ad solvendum quantitatem hujusmodi nos et ordo minime teneremur durante treuga supradicta. Et hec cum dictis abbatibus et prioribus ordinavimus facienda modis et conditionibus infrascriptis, videlicet quod per subventionem hujusmodi nullum jus in possessione vel in proprietate contra nos et dictum ordinem, necnon et contra privilegia et libertates dicti ordinis, in casu simili vel dissimili, dicto domino regi aut suis successoribus acquiratur de novo et quod nullum fiat nobis prejudicium in futurum. Iterum quod dictus dominus rex vel sui, durante dicto biennio, a nobis et personis, familia et hominibus dicti ordinis nullam aliam subventionem seu prestationem aut servicium aliud quodlibet et quodcumque in rebus propriis vel personis occasione dissensionis et neccessitatis hujusmodi possit aut valeat exigere, petere etiam vel levare, rursusque nulli duces, comites, barones, castellani et alii domini quilibet et quicumque, quocumque nomine censeantur, a nobis et dicto ordine, personis et familia et hominibus dicti ordinis occasione dissensionis et neccessitatis hujusmodi, pro quibus dictus dominus rex subventionem habet predictam, vel per se vel per alios possint exigere vel levare, vel eos in personis vel rebus afficere, gravare, cogere, onerare, aut alias opprimere quoquomodo. Et si contrarium eveniret, quod dictus dominus rex nos et eos deffenderet a predictis et amoveret predicta. In quorum omnium testimonium presentibus litteris sigillum nostrum duximus apponendum. Datum die dominica post festum beati Michaelis, anno Domini millesimo ducentesimo nonagesimo quarto. (Scellé sur double queue du sceau en cire verte de Guillaume, abbé de Cluny)