CCE: cartae cluniacenses electronicae
Database of the Charters of the abbey of Cluny (802-1300)

BB 5410     View  [Back]
Instrumentum publicum quo notum est Guillelmum IV, abbatem Cluniacensem, contulisse Bertrando, priori de Nogento, prioratum de Karitate.
In nomine Domini. Amen. Anno ejusdem a Nativitate millesimo CCo nonagesimo quinto, indictione octava, die tercio decimo mensis februarii, pontificatus sanctissimi patris domini Bonifacii pape octavi anno primo, in presentia mei notarii infrascripti et testium subscriptorum ad hoc specialiter vocatorum et rogatorum, venerabilis pater dominus Guillelmus, Dei gratia abbas monasterii Cluniacensis, intendens ordinare priorem in prioratu de Karitate super Ligerim, nunc priore vacante, processit in ordinatione hujusmodi in hunc modum: «Cum prioratus noster de Karitate super Ligerim, Autissiodorensis diocesis, nobis et ecclesie nostre Cluniacensi spiritualiter et temporaliter immediate subjectus, vacet ad presens per promotionem reverendi patris domini Symonis, Dei gratia tituli Sancte Balbine presbiteri cardinalis, quondam prioris ipsius prioratus de Karitate, et ordinatio prioris in eodem prioratu ad nos pertineat omnimode, et fieri debeat prorsus, juxta Cluniacensis abbatis arbitrium voluntatis, sicut in ceteris nostri ordinis prioratibus, nos volentes ibidem ordinare priorem qui preesse valeat et prodesse, super ordinatione hujusmodi, communicato prius consilio et deliberatione prehabita diligenti cum pluribus prioribus et monachis nostri ordinis, tam de Cluniaco quam de Karitate et aliis, nostra tantum et nostre Cluniacensis ecclesie auctoritate, et non ad postulationem, nominationem seu electionem alicujus seu aliquorum, sed nostre solummodo arbitrio voluntatis, vobis domino Bertrando, priori domus nostre de Nongento Rotrodi, dictum prioratum nostrum de Karitate, cum suis pertinentiis, committimus spiritualiter et temporaliter gubernandum, preficiendo vos eidem prioratui in priorem.» Qui dominus Bertrandus, petita venia, reputans se insufficientem de recipiendo tanto onere, se multipliciter excusavit. Tandem, ut debuit, humiliter obedivit et ordinationem ac commissionem dicto modo sibi factam de predicto prioratu Karitatensi humiliter acceptavit. Unde predictus dominus abbas rogavit me Johannem Nicolai de Guarcino, notarium publicum infrascriptum, ut ad perpetuam rei memoriam de predictis omnibus conficiam publicum instrumentum; volens insuper idem dominus abbas, ad majorem memoriam et cautelam, quod religiosi viri dominus Berardus, de Pontida, dominus Symon, Sancti Albani Basiliensis, dominus Guillelmus, de Contamina, Jacobus, de Seldon, ac Guido, de Diana monasteriorum priores, tunc ibidem presentes, sigilla sua apponant huic publico instrumento. Actum et datum Rome, in hospicio in quo morabatur predictus dominus abbas, presentibus religiosis viris domino Raymundo, abbate Pulteriarum, ac Andrea de Sancto Ciriaco, monacho Pulteriensi, domino Guillelmo de Mineriis, Guillelmo de Espessia, camerario Cossiaci, Jacobo de Grueria, Roberto de Talaya, Humberto de Nolliaco, et Guillelmo de Parisius, monachis Cluniacensis ordinis, ac magistro Johanne de Leyo, procuratore in Romana curia, domine Blance, filie quondam regis Francie, magistro Theobaldo de Thelono, phisico, curato ecclesie Sancti Laurentii Briennensis, Durando de Marsiniaco, Durando de Cabannis et Guillelmo de Lingonis, clericis, ac Johanne de Vallibus, Johanne de Subtus Turrim, Guidone de Malliaco, Hugone de Varay et Therrico Theotonico, domicellis, testibus ad premissa vocatis specialiter et rogatis. (A la suite le seing et la certification du notaire)
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung