Religioso ac reverendo in Christo patri domino Guillelmo, divina providentia abbati Cluniacensi, vel ejus locum tenenti, frater Hugo Chatardi, prior claustralis monasterii de Mauziaco, Cluniacensis ordinis, Claromontensis dyocesis, totusque ejusdem loci Deo devotus conventus, ejus humiles et devoti, se ipsos cum reverencia tam debita quam devota. Ecclesia nostra per mortem bone memorie fratris Guillelmi de Sancto Saturnino, quondam abbatis nostri, pastoris destituta regimine, procuratores nostros ad vestram clemenciam destinamus, per quos petimus et supplicamus per vos favorabiliter admitti provisionem seu postulacionem de religioso viro, fratre Petro de Valeriis, priore de Cella Bruerie et monacho monasterii Dolensis, Bituricensis dyocesis, per nos in capitulo ejusdem nostri monasterii concorditer celebratam, prout in litteris et processibus super premissis confectis et vestre reverende paternitati directis plenius continetur. Quapropter vestre bonitati supplicamus humiliter et devote, quatinus supplicationibus nostris et precibus misericorditer ac benigniter inclinati supradictam provisionem seu postulacionem de predicto fratre Petro sic per nos concorditer celebratam, per cujus industriam, prudenciam ac diligenciam, de quibus nobis co[n]stat ad plenum, cum inter nos et in monasterio nostro sue juventutis tempore conversatus diutius fuerit et maturatus, speramus actore Domino in temporalibus et spiritualibus salubriter provideri eidem nostro monasterio, admittentes misericorditer et benigne eumdemque fratrem Petrum sine difficultate, si placet, nobis in abbatem concedere dignemini et pastorem. Firmiter enim credimus, presumimus et speramus tam propter premissa, quam propter hoc quod bone memorie fratres Aymericus et Petrus de Yssarpano, quondam ejusdem nostri monasterii abbates, de quorum parentela et genere idem frater Petrus proveniens nepos extitit eorumdem, qui salubriter, utiliter et laudabiliter se habuerunt in regimine nostri monasterii antedicti, ecclesia nostra predicta que per dicti fratris Guillelmi, sui quondam pastoris, obitum est collapsa ac alias diversis obligacionibus et debitis est depressa, exurgat jam de lamentis et lacrimis in successione ipsius fratris Petri predicti et ejus digno regimine reparetur. Bene et diu valeat vestra paternitas reverenda. (Lettre close)