Bonifacius, episcopus, servus servorum Dei, dilecto filio Bertrando, priori prioratus de Caritate, Cluniacensis ordinis, Autisiodorensis diocesis, salutem et apostolicam benedictionem. Dudum prioratu de Caritate, Cluniacensis ordinis, Autisiodorensis diocesis, per promotionem dilecti filii nostri Symonis, tituli Sancte Balbine presbiteri cardinalis, tunc ipsius prioratus prioris, vacante, dilectus filius G., abbas monasterii Cluniacensis, ad Romanam ecclesiam nullo medio pertinentis, nuper apud Sedem apostolicam moram trahens, cum te in priorem jam dicto prioratui prefecisset, requisito prius humiliter nostre beneplacito voluntatis, nonnulli priores et monachi ejusdem ordinis, tunc apud Sedem constituti predictam, ex parte conventus prioratus ejusdem, ut dicitur, destinati, asserentes fore a longis retro temporibus inconcusse ac inviolabiliter observatum, quod cum prioratum ipsum vacare contingit, idem conventus tres personas ordinis ejusdem ydoneas abbati Cluniacensi qui est pro tempore, nominat et presentat eidem, ut unam ex illis quam preferendam viderit, in priorem preficiat prioratui memorato, provisioni hujusmodi de te facte, cum hoc in provisione ipsa servatum non fuerat, se opponunt; te in contrarium proponente quod idem abbas prefato prioratui cum vacare contingit eundem libere potest et debet, nulla prelibati conventus hujusmodi nominatione seu presentatione preambula, providere. Nos igitur, ad statum tranquillum et prosperum monasterii et prioratus ipsorum, paternis studiis intendentes, et cupientes cujusvis in hac parte dissensionis et scandali materiam summovere, provisionem hujusmodi per eumdem abbatem, sicut premittitur, de te factam ratam manere volumus de gratia speciali. Per hoc autem abbati et monasterio Cluniacensi predictis, quoad possessionem vel proprietatem, sive conventui aut monachis prioratus Caritatensis predicti, quoad petitorium vel possessorium, nequaquam intendimus aliquod jus diminui vel acquiri de novo, sed utramque partem illud jus habere, ac in eo esse volumus et servari in quo erat priusquam esset hujusmodi provisio de te facta. Nos vero partes ad Sedem apostolicam evocare disponimus et summarie, de plano ac sine strepitu et figura judicii, hujusmodi questionis negocium celeriter, actore Domino, terminare. Datum Anagnie, IIII idus julii, pontificatus nostri anno primo.