Bonifacius, episcopus, servus servorum Dei, dilectis filiis ... Sancti Germani Autisyodorensis, et de Sancto Laurentio Autisyodorensis diocesis monasteriorum abbatibus, salutem et apostolicam benedictionem. Dudum, etc., provisionem hujusmodi per eundem abbatem, sicut premittitur, de prefato Bertrando factam, ratam manere volumus de gratia speciali. Per hoc autem abbati, etc. (usque ad:) et servari in quo erat priusquam esset de Bertrando predicto hujusmodi provisio subsecuta. Quocirca discretioni vestre per apostolica scripta mandamus quatinus vos vel alter vestrum, per vos vel per alium seu alios eundem B. priorem vel procuratorem suum, ejus nomine, in corporalem possessionem ejusdem prioratus de Caritate ac jurium et pertinentiarum ejus inducatis auctoritate nostra, et defendatis inductum, amoto exinde quolibet detentore, sibique vel dicto procuratori pro eo de ipsius prioratus fructibus, redditibus, proventibus, juribus et obventionibus universis faciatis integre responderi. Non obstante si aliquibus a prefata Sede indultum existat, quod interdici, suspendi vel excommunicari non possint per litteras dicte Sedis non facientes plenam et expressam de indulto hujusmodi mentionem, et qualibet alia prefate Sedis indulgentia generali vel speciali, cujuscumque tenoris existat, per quam effectus presentium impediri valeat vel differri; contradictores per censuram ecclesiasticam, appellatione postposita, compescendo, invocato ad hoc, si opus fuerit, auxilio brachii secularis. Datum Agnanie (sic), III idus augusti, pontificatus nostri anno primo.