Universis presentes litteras inspecturis, Mochetus Guidi, valetus domini nostri regis Francorum, salutem. Noveritis quod ego Mochetus, nomine nepotum meorum, Thiguini Bardoneti et Arbizonis Symonis Juliani, et pro ipsis, habui et recepi a venerabili in Christo patre B., Dei gratia abbate Cluniacensi, per manus Guidonis Falconerii, tradentibus religiosis viris Hugone de Barro, priore scholar[i]um Cluniacensium Parisiis studentium, et Stephano de Arcu et reverendo subcamerario Sancti Martini de Campis juxta Parisius, monachis Cluniacensibus, quinque milia et quatuor centum et tresdecim florenos, cum sex solidis et undecim denariis parvorum turonensium, de summa sexdecim milium florenorum, quos predicti T. et A. predicto domino Cluniacensi abbati, pro sua confirmatione in curia romana prestaverunt. De qua summa florenorum predictorum teneo me plenarie pro pagato nomine nepotum meorum supradictorum, et abbatem Cluniacensem, quantum ad summam supradictam, per predictum Guidonem receptam nomine nepotum meorum in bonis florenis, promitto garantizare erga predictos Thyguinum et Arbizonem, ipsumque abbatem indempnem perpetuo conservare. In cujus rei testimonium, sigillum meum presentibus litteris duxi apponendum. Datum Parisiis, die sabbati post festum beati Dyonisii sociorumque ejus, anno Domini M^o CC^o nonagesimo sexto.