Bonifacius, etc., abbati monasterii Cluniacensis, etc., et suppriori prioratus de Karitate, nunc priore carentis, etc. Super gregem, etc. Nuper siquidem ex parte nostra gaudenter accepimus quod cum dudum inter te abbas, nomine monasterii tui Cluniacensis, ex parte una, et vos, supprior et conventus Caritatensis, ex altera, verteretur materia questionis, super eo videlicet quod vos supprior et conventus Caritatensis predicti asserebatis vos esse ac fuisse in possessione vel quasi et ad vos pertinere, quotiens prioratum ipsum de Caritate vacare contingeret, tres de ordine Cluniacensi abbati vestro Cluniacensi qui est et qui pro tempore fuerit, nomine monasterii seu prioratus vestri de Caritate, presentare personas et unam de illis tribus personis quam mallet vobis preficere in priorem; et abbas quo supra nomine asserente ac tenente contrarium, etc. (Suit la paraphrase de l'acte de sept. 1296) Quare nobis humiliter supplicastis ut compositionem, conventionem, concordiam et ordinationem vestram hujusmodi et alia predicta et singula, ratificare, confirmare et approbare ac supplere omnem defectum, si quis in eis vel eorum aliquo extitit ex quacumque causa, necnon decernere irritum et inane, si super hiis vel aliquo eorumdem secus a quoquam extiterit attemptatum, de apostolice plenitudine potestatis, ex certa scientia dignaremur. Nos itaque vestris supplicationibus inclinati, hujusmodi compositionem, conventionem, concordiam et ordinationem, ac omnia premissa et singula rata habentes et quitta, et supplentes omnem defectum qui in eis vel eorum aliquo, propter vacationem dicti prioratus Caritatensis, qui nunc temporis noscebatur et adhuc noscitur carere priore, vel ex quacumque alia causa extitit illa, de apostolice plenitudine potestatis, ex certa scientia, auctoritate apostolica ratificamus, confirmamus et approbamus, et presentis scripti patrocinio communimus, ac decernimus irritum et inane si super hiis vel eorum aliquo secus a quoquam scienter vel ignoranter contigerit attemptari. Tenorem autem predictarum litterarum de verbo ad verbum fecimus presentibus annotari, qui talis est: «Universis, etc.» (Supra, n° 5448.) Nulli ergo, etc. Si quis, etc. Datum Rome, apud Sanctum Petrum, nonis januarii, pontificatus nostri anno secundo.