Bonifacius, episcopus, servus servorum Dei, dilectis filiis ... abbati monasterii Cluniacensis, ad Romanam ecclesiam nullo medio pertinentis, et ... suppriori prioratus de Caritate, Cluniacensis ordinis, ac eorumdem monasterii et prioratus conventibus, Matisconensis et Autisiodorensis diocesum, salutem et apostolicam benedictionem. Etsi religiosorum locorum et personarum ipsorum sollicitudo nobis immineat generalis, de illorum tamen statu prospero cogitare attentius nos oportet, que solacio destituta pastoris oblate remedia provisionis exposcunt, ne per vacationem diutinam gravia dispendia patiantur. Sane vacante dudum prioratu vestro de Caritate, Cluniacensis ordinis, Autisiodorensis diocesis, per promotionem tuam, fili abbas, per nos factam ad monasterium Cluniacense de te, tunc prioratus predicti priore, nos, ne occasione discordie que erat inter vos super nominatione et presentatione ac provisione prioris in predicto prioratu cum eum vacare contingit faciendis, scandala et dampna emergerent hinc et inde, provisionem dicti prioratus de Caritate dispositioni nostre ac apostolice Sedis ea vice duximus reservandam, et intendentes causam hujusmodi celeriter terminare, vos abbatem et conventum Cluniacenses, pro parte una, et vos conventum Caritatis, ex altera, ex parte vestra peremptorie citari mandavimus, ut infra certi temporis spatium, post citationem eandem per procuratores ydoneos super hujusmodi negotio sufficienter instructos, cum omnibus actis, juribus et monimentis vestris negocium contingentibus memoratum, Sedis apostolice vos presentare conspectui curaretis, diffinitionem et terminationem salubrem et celerem super predicto negotio recepturi. Et ne prioratus predictus interim neglectui expositus videretur, neve careret oportune cure presidio, curam et administrationem ipsius prioratus ac aliorum prioratuum, ecclesiarum et membrorum subjectorum eidem dilectis filiis Oddoni, de Borto, et Gerardo, de Joigniaco prioribus, Cluniacensis ordinis, Lemovicensis et Senonensis diocesum, in spiritualibus et temporalibus per nostras sub certa forma litteras duximus committendas, donec per dictam Sedem id revocari contingeret vel de dicto prioratu foret aliter ordinatum. Nuper autem, accepto quod ad certam conventionem, concordiam et ordinationem inter vos super hujusmodi questione ac discordia devenistis, nos super hoc vobis in Domino congaudentes, conventionem, concordiam et ordinationem hujusmodi duximus per alias nostras sub certa forma litteras ad vestre supplicationis instantiam confirmandas. Nolentes etiam ut predictus prioratus Caritatensis per vacationem diutinam dispendia patiatur, discretioni vestre per apostolica scripta mandamus quatinus ad provisionem de priore dicto prioratui faciendam, juxta hujusmodi vestre conventionis, concordie ac ordinationis inter vos habite et per nos confirmate formam et modum, debita diligentia et sollicitudine previa procedentes, ac habentes pre oculis solum Deum, provideatis de persona ydonea prioratui memorato. Super quo vobis hujusmodi nostris reservatione, citatione et commissione administrationis vel aliis supradictis nequaquam obstantibus, liberam licentiam auctoritate presentium elargimur. Nulli, etc. Si quis, etc. Datum Rome, apud Sanctum Petrum, nonis januarii, pontificatus nostri anno secundo.