CCE: cartae cluniacenses electronicae
Database of the Charters of the abbey of Cluny (802-1300)

BB 5457     View  [Back]
Instrumentum publicum quo notum est abbatem Lesatensem juravisse obedientiam abbati Cluniacensi.
Universis presentes litteras inspecturis, nos fratres Hugo, Dei gratia abbas monasterii Thiernensis, Cluniacensis ordinis, Guichardus, humilis prior magnus Cluniacensis, Guillelmus, de Martiniaco, Ansericus, de Sancto Marcello Cabilonensi, Johannes, Sancti Eutropii Xantonensis prioratuum priores, ac Hugo, de Cluniaco, Johannes de Nongendo, decani, Cluniacensis ordinis prefati, notum facimus quod in nostra et infrascriptorum presentia, venerabilis et religiosus pater domnus Raymundus de Baura, abbas monasterii Lesatensis, Cluniacensis ordinis, Appamiarensis (sic) diocesis, sponte, cum ad denonciationem quorumdam et alias super pluribus, ad mandatum reverendi patris in Christo domini Bertrandi, Dei gratia abbatis Cluniacensis, per venerabiles et religiosos ac discretos et probos viros, domnos Richardum, de Sancto Oriencio, et Arnaldum, de Aleriaco prioratuum priores, ipsius ordinis, contra ipsum R[aymundum], Lesatensem abbatem, fuisset inquisitum, prout iidem domni abbates in pleno capitulo Cluniacensi publice dixerant coram conventu Cluniacensi, die nona intrante mense madio, anno infrascripto, ipsa inquisitione adhuc clausa remanente, dixit, legit et coram ipso domino abbate Cluniacensi, obtulit hec que sequuntur sub hac forma: «Reverende pater et domine, domine Bertrande, Cluniacensis abbas, ego frater Raymundus, abbas vestri monasterii Lezatensis, Cluniacensis ordinis, fui, sum et ero et esse propono, quamdiu vixero, vobis et ecclesie Cluniacensi et ordini obediens et devotus, et paratus sum in omnibus et per omnia secundum voluntatem vestram vobis et ordini obedire. Et hec juro; et me super predictis, ob reverentiam persone vestre, et hujus vestre Cluniacensis ecclesie suppono vestre bene placito voluntatis.» Quibus sic oblatis, dictis et lectis ipsi domino abbati Cluniacensi, idem abbas Lesatensis juravit ad sancta Dei euvangelia, corporaliter tacto libro, et promisit in manu dicti domini Cluniacensis abbatis omnia et singula supradicta, ac ipsa perpetuo attendere et inviolabiliter observare. Quibus receptis et actis, prefatus domnus Cluniacensis eidem abbati Lesatensi incontinenti dixit verba que sequuntur: «Et nos, in virtute sancte obedientie et sub debito prestiti juramenti vobis, abbas Lesatensis, inhibemus omnem alienationem illicitam et contra jura seu statuta publica, vel Cluniacensis ordinis diffinitiones vel que essent in dampnum nostri monasterii Lesatensis. Iterum modo quo supra vobis precipimus, injungimus et mandamus ut missos monachos ad vos per nos recipiatis, et ejectos quos illuc missi per nos vel predecessores nostros fuerunt, ad dictum nostrum Lesatense monasterium reducatis et fraterna tractetis in Domino caritate, et nos interdum proponimus in illis partibus ad festum instans beate Marie Magdelene interesse, et vobis faciemus quod fuerit rationis.» Actum Cluniaco, decima die mensis madii intrantis, in presentia nostra et Guidonis, de Tisiaco, Poncii, de Sancto Germano in Montibus, Petri, de Sancto Ferreolo, Poncii, de Bredonio prioratuum Cluniacensis ordinis prioribus, et aliis pluribus prioribus et monachis dicti ordinis ad hoc vocatis et rogatis. In cujus rei testimonium, sigilla nostra hiis presentibus litteris duximus apponenda. Actum loco, die, mense quibus supra, videlicet die decima dicti mensis, anno Domini Mo IIc mo nonagesimo septimo.
(Au dos:) Quomodo abbas Lezatensis prestitit obedientiam domno Cluniacensi, anno XCVII.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung