Quia reverendus pater domnus B[ertrandus], abbas Cluniacensis, anno nuper preterito ad monasterium Balmense, Cluniacensis ordinis, Bisuntinensis diocesis, necnon ad prioratus de Dola, et de Joa dicti ordinis, sub dicto monasterio existentes, re et fama, prout fertur communiter, visitatione et correctione plurimum indigentes, tam in capite quam in membris, causa visitandi et corrigendi personaliter accedendo, ab abbate dicti monasterii Balmensis et a fratribus Guillelmo, priore Beate Marie Jurensis monasterii, Gerardo de Ledone, celerario et camerario Balmensibus, cum multitudine armatorum eidem reverendo patri obicientibus sibique resistentibus palam et publice et minas multiplices sibi et suis qui cum eo venerant inferentibus et incussientibus, coactus extitit retrocedere et a preconcepto hujus sue visitationis proposito totaliter resilire, propter quod reverendus pater, prout nobis constitit de predictis, dictos abbatem, priores et monachos Balmenses excommunicationis vinculo innodavit, conventumque Balmensem supposuit ecclesiastico interdicto pro offensa manifesta. Itidem de Joa et de Dola prioribus faciens reverendus pater predictus pro eo quod dicti priores ipsum ad eorum prioratus visitatione et correctione non modicum indigentes admittere noluerint, quin immo pulsatis campanis et populo per eos congregato ad resistendum violenter et injuriandum eidem et familie ejusdem, palam et publice insurrexerunt in eum ipsum, quare retrocedere compulerunt; simili modo priorem de Ledone predictum excommunicando pro eo quod tunc temporis dictis de Dola et de Joa prioribus consilium, favorem et auxilium in hujusmodi faciendis publice impendebat, omnes et singulos supradictos per dictum reverendum patrem sic excommunicatos, idem reverendus pater iterum in hoc instanti capitulo generali, in presentia omnium ad dictum capitulum Cluniense venientium aggravavit pro facto hujusmodi sollempniter et in scriptis. Quas siquidem sententias et aggravationes diffinitores generalis capituli Cluniacensis approbant, corroborant et confirmant. Rursus cum dictus abbas Balmensis et quidam priores et monachi dicti monasterii Balmensis quosdam priores et monachos ordinis Cluniacensis ad dictum generale capitulum venientes, necnon victualia que ad ipsum capitulum et pro eodem capitulo portabantur nuper ceperint et arrestaverint, capi et arrestari procuraverint palam et publice, dampnaliter et dampnose dictosque priores et monachos adhuc captos detineant in prejudicium dicti capituli generalis ad quod veniebant necnon in contemptum Sedis apostolice, cujus auctoritate dictum capitulum est statutum et in Cluniaco annis singulis celebratur, propter quod sub protectione Sedis apostolice abbates, priores et monachi ad dictum capitulum venientes existere dignoscuntur, idem reverendus pater publice in dicto capitulo generali, coram omnibus qui ibidem venerant, dictos abbatem, priores et monachos Balmenses propter factum hujusmodi excommunicatos a canone publice nunciavit. Quam siquidem denunciationem dicti diffinitores approbant ac confirmant, ordinantes et precipientes quod dictus reverendus pater et totus ordo Cluniacensis contra dictos abbatem et conventum, priores et monachos Balmenses omnia et singula supradicta tam in Romana curia quam alibi viriliter prosequantur. Actum et datum Cluniaco, in capitulo generali, anno Domini millesimo ducentesimo nonagesimo octavo.