Nos frater Johannes, miseratione divina Valentinensis et Dyensis episcopus et nos capitulum Dyensis ecclesie, notum facimus universis presentibus et futuris, quod nos diligenti tractatu et deliberatione inter nos invicem prehabitis pro divino cultu augendo et pro ordine Clugniacensi, qui inter ceteros ordines in fervore devocionis et religionis viget et viguit, gratumque Deo usque ad hec tempora famulatum exhibuit et uberius exhibebit favente Domino in futurum, penes nos in civitate Dyensi fu[n]dando, plantando, alliciendo etiam et fovendo de consensu et voluntate fratrum Alberti Blemundi et Poncii Martelli, canonicorum regularium domus Sancti Marcelli Dyensis, quondam ordinis Sancti Augustini, qui soli in dicta domo tunc temporis morabantur, habitumque Clugniacensem de nostra episcopi supradicti licencia petierunt et ipsum post petitam a nobis licenciam et obtentam, de manu fratris Guichardi, tunc prioris majoris Clugniacensis, per venerabilem patrem dominum Bertrandum, Dei gratia abbatem Clugniacensem, ad hec et consimilia et ea tangencia facienda et recipienda specialiter destinati, humiliter receperunt, qui eciam postmodum in presencia dicti venerabilis patris abbatis Clugniacensis ad dictam domum Sancti Marcelli personaliter venientis sollempnem professionem, que in ordine Clugniacensi consuevit fieri, fecerunt et ab eodem abbate benedictionem, que in dicto Clugniacensi ordine dari solet profitentibus, receperunt. Damus unanimiter et concedimus donatione seu concessione perpetua et irrevocabili memorato venerabili patri Clugniacensi et per eum suis successoribus, abbatibus Clugniacensibus, ecclesieque et ordini Cluniacensi et in eosdem totaliter transferimus quicquid juris temporalis vel quasi, spiritualis vel quasi, quicquid etiam subicionis vel quasi, possessionis vel quasi, superioritatis, jurisdiccionis et dominii habebamus, habemus aut habere possumus quoquo modo in dicta domo Sancti Marcelli Dyensis omnibusque et singulis membris, pertinenciis, appendiciis, juribus et actionibus eorumdem. Nos de omnibus et singulis supradictis devestientes totaliter abbatemque Clugniacensem predictum et suos successores, ecclesiam Clugniacensem et ordinem supradictos investientes corporaliter de eisdem eaque omnia et singula supradicta in eosdem plenarie transferentes, salva tamen et reservata nobis prefato episcopo nostrisque futuris successoribus procuracione annua nobis et eisdem successoribus nostris, racione dumtaxat parrochialis ecclesie Sancti Marcelli predicti et non cujusquam visitacionis seu correccionis exercende in priorem, monachos conversos, aut in aliquem de familia dicte domus. Volentes et consencientes expresse quod in sepedicta domo ab abbate Clugniacensi predicto et suis successoribus prior et monachi creentur exnunc in antea et ponantur prout dicti abbatis suorumque successorum fuerit voluntatis, qui prior et monachi secundum instituta et regulares observancias Clugniacenses, prout dicto abbati et suis successoribus visum fuerit, religiose et devote ibidem degant et vivant et prout in aliis dicti Clugniacensis ordinis domibus, locis et prioratibus ejusdem fieri consuevit, Altissimo deserviant in divinis. Dictaque domus Sancti Marcelli, prior et monachi qui sunt ibidem et qui pro tempore fuerint exnunc in antea, perpetuo et immediate ac totaliter subiciantur et subsint dicto abbati Clugniacensi suisque futuris successoribus, ecclesie et ordini Clugniacensi, sicut cetera loca, priores et monachi dicti Clugniacensis ordinis sibi quoquo modo subjecti consueverunt eis subici et subesse; illisque privilegiis, libertatibus, immunitatibus et indulgenciis impetratis et impetrandis exnunc in antea gaudeant et utantur, gaudebunt etiam in posterum et utentur, quibus alia loca et prioratus Clugniacensis ordinis, priores et monachi ejusdem, quicumque sint et fuerint, uti consueverunt hactenus et gaudere. Volumus insuper quod nec nos nec successores nostri contra donacionem, concessionem, translacionem et investituram predictas seu contra quecumque alia premissa aut eorum quodlibet aliqua possessione, consuetudine, usu, prescripcione seu quacumque diuturnitate temporis, quamtumcumque longua (sic) vel longissima, possimus juvare nos, deffendere aut tueri adversus dictum abbatem aut successores ejusdem, ecclesiam et ordinem Clugniacensem, quominus omnia et singula suprascripta firmam et perpetuam roboris habeant firmitatem. In quorum omnium testimonium et perpetuam hujus rei memoriam presentes litteras sigillorum nostrorum munimine fecimus roborari. Datum apud Dyam, die martis in crastinum festi beatorum Fabiani et Sebastiani, anno Domini millesimo ducentesimo nonagesimo septimo. (Traces de deux sceaux)