Hec est nota facta et concordata per fratrem Guillelmum, abbatem de Balerna, et fratrem Hugonem, priorem fratrum predicatorum de Polligniaco, pro Balmensi ecclesia, ex una parte et per abbatem Figiacum (sic), priorem Sancti Martini de Campis Parisiensis, priorem de Longo Ponte, pro Cluniacensi ecclesia, ex altera. Notum sit, etc. Balmenses confitentur et confitebuntur omnimodam subjectionem, reverentiam et obedientiam tam pro capite quam pro membris Cluniacensi ecclesie, videlicet quod vacante Balmensi ecclesia a domno abbate Cluniacensi petita littera et optenta eligendi personam ydoneam de gremio Cluniacensis ecclesie, electo confirmabitur ab abbate Cluniacensi, prout de jure et consuetudine Cluniacensis ecclesie fuerit faciendum et jurabit sibi electus obedientiam et fidelitatem et ab eo recipiet baculum pastorale. Visitabitur, reformabitur, procurabitur Balmense monasterium tam in capite quam in membris per abbatem Cluniacensem ac etiam corrigetur, tanquam per suum ordinarium seu per visitatores vel visitatorem ab abbate Cluniacensi vel definitoribus Cluniacensis generalis capituli destinatos reformabitur, et etiam corrigetur et annis singulis veniet abbas Balmensis ad Cluniacense capitulum generale et in novitate abbatis Cluniacensis recepturus processionaliter a Balmensibus in Balmense monasterio dictus abbas Cluniacensis tam in capite quam in membris monachos Balmenses flexis genibus dictorum monachorum manus suas inter manus domni abbatis Cluniacensis ponentes, ipsos ad osculum pacis recipiet. Statuta, diffinitiones, correctiones, procurationes, visitationes, ordinationes et precepta domni abbatis Cluniacensis et definitorum recipient et etiam observabunt; subsidia, subventiones per Sedem apostolicam Cluniacensi ecclesie concessas vel et concedendas vel alias a generali Cluniacensi capitulo ordinatas solvent ac etiam exhibebunt et, ut breviter omnia concludantur, ecclesie Cluniacensi omnimodam subjectionem, reverentiam et obedientiam que debetur seu deberi potest matri ecclesie recognoscent et exhibebunt; appellationi quam fecerunt super vicesima ecclesie Cluniacensi a domno papa concessa renunciabunt; super arreragiis vero vicesime sex annorum et quinque annorum de tempore tam domni Guillelmi abbatis premortui quam de tempore istius Cluniacensis abbatis et super expensis factis occasione dictarum vicesimarum et super expensis factis occasione visitationis a Balmensibus domno abbati Cluniacensi denegate, necnon super omnibus aliis expensis, dampnis, deperditis injuriose a Balmensibus vel ab aliquo, nomine eorumdem, domno abbati Cluniacensi vel monachis Cluniacensis ordinis et ejusdem locis ecclesie irrogatis et super omnibus aliis dampnis et expensis compulsis occasione premissorum seu premissa tangentium Cluniacensi ecclesie inflictis stabitur arbitrio et ordinationi religiosorum virorum abbatis de Balerna et prioris de Longo Ponte et si (quod absit!) predictos vel aliquem ex ipsis contigerit exivis ab humanis seu alias absentari, per priorem Sancti Lupi et magistrum Hugonem de Monte Moreto predicta ordinentur ac etiam arbitrentur et predicti V tractatores, videlicet abbas de Balerna, prior de Poligniaco, abbas Figiacensis, prior Sancti Martini de Campis Parisiensis, prior de Longo Ponte promiserunt sub voto religionis ac etiam juramento quod omnia et singula que superius sunt expressa vel que possunt in premissis seu premissa tangentibus rationabiliter comprehendi, facient et pro posse suo procurabunt ab utraque parte firmari, vallari penis, juramentis, ac etiam observari, videlicet predicti domnus abbas de Balerna, prior de Poligniaco ab abbate et monachis Balmensibus; abbas Figiacensis, prior Sancti Martini Parisiensis, prior de Longo Ponte ab abbate et conventu Cluniacensibus, ista omnia penis, juramentis, sigillis antedictis et aliis debitis sollempnitatibus vallabuntur, necnon procurabunt dicte ecclesie Balmensi et ecclesie Cluniacensi omnia predicta per Sedem apostolicam ad communes expensas confirmari. Actum est etiam quod quando ecclesia Cluniacensis erit in pacifica possessione habendi et percipiendi omnimodam subjectionem et reverentiam, etc. prout in nota superius sunt expressa, Cluniacensis ecclesia obligabit se et concedet quod, ecclesia Balmensi vacante, monachi Balmenses possent eligere personam ydoneam de gremio Balmensi seu de gremio Cluniacensis ecclesie, hoc addito quod si archiepiscopus Bisuntinensis infestaret Balmensem et Cluniacensem ecclesias tam in capite quam in membris super aliqua subjectione habenda ratione superioritatis in Balmense monasterium, Cluniacensis et Balmensis ecclesie se adinvicem adjuvabunt et pro quarta parte in lite prosequenda contribuet Balmensis ecclesia in expensis seu alio modo componet cum archiepiscopo Bisuntinensi, prout abbati Cluniacensi, habito cum Balmensi consilio, videbitur expedire et hec omnia ab utraque parte confirmabuntur penis, solempnitatibus ac etiam juramentis. In quorum omnium testimonium nos predictus abbas de Balerna, prior fratrum Predicatorum de Polligniaco, abbas Figiacensis, prior Sancti Martini de Campis Parisiensis, prior de Longo Ponte sigilla nostra presentibus litteris duximus apponenda. Datum apud Cluniacum, IIII^o nonas maii, anno Domini M^o CC^o nonagesimo nono.