Nos frater Petrus, Dei gratia humilis abbas Novi Monasterii Sancti Johannis Pictavensis, notum facimus universis presentes litteras inspecturis quod cum hiis diebus jam diu est preteritis, vacante dicto Novo Monasterio Sancti Johannis Pictavensis per liberam resignationem bone memorie Guillermi Garini, quondam abbatis dicti monasterii, predecessoris nostri, inter reverendum patrem nostrum domnum B[ertrandum], Dei gratia abbatem Cluniacensem et fratrem Petrum de Julleyo, priorem claustralem dicti Novi Monasterii Pictavensis, suo dictique prioris claustralis et Cluniacensis ecclesie nomine, ex una parte, et suppriorem et conventum dicti Novi Monasterii, ex altera, discordia verteretur, prefato reverendo patre et dicto priore claustrali, nomine quo supra, dicentibus et proponentibus quod pro habenda a dicto reverendo patre licencia eligendi abbatem in dicto monasterio, dictus prior claustralis una cum suppriore dicti Novi Monasterii et conventu supplicare et subscribere dicto reverendo patri consueverat et debebat, super eo etiam quod idem reverendus pater, tam suo quam dicti prioris claustralis nomine, dicebat dictum priorem claustralem tractatui electionis abbatis dicti Novi Monasterii et in ipsa electione interesse debere et in ea vocem habere; dictis suppriore et conventu prefati monasterii ex adverso dicentibus quod dictus prior claustralis pro habenda licencia hujusmodi eligendi abbatem in dicto monasterio supplicare aut subscribere electioni seu tractatui electionis abbatis ibidem interesse aut in ea vocem habere nec consueverat nec debebat et tandem, quia dictus prior claustralis, vacante dicto monasterio, ut dictum est, ad predictos actus admissus fuerat sub protestatione quod vox sua valeret, si valere deberet, deliberatione per eundem reverendum patrem cum majoribus et probis de ordine suo prehabita diligenti super hujusmodi discordia, prout sequitur, consentientibus partibus, ordinavit videlicet quod actus illi prioris claustralis predicti qui sub protestatione, ut dictum est, ad subscribendum, ad tractandum de electione et in ipsa electione admissus fuerat, predictis suppriori et conventui aut eorum successoribus seu ipsi monasterio exnunc inantea non noceant nec eis in posterum prejudicent, nisi de jure dicti reverendi patris et dicti prioris claustralis et Cluniacensis ecclesie, si quod eidem reverendo patri aut successoribus suis, ecclesie Cluniacensi, seu priori claustrali predicto in predictis actibus competat per dictum reverendum patrem aut successores suos seu per priorem claustralem futuris temporibus ostendi contingeret liquidius aut doceri; quam ordinationem inter dictum reverendum patrem et priorem claustralem predictos ac suppriorem et conventum dicti monasterii factam, ut superius est expressum, nostro et dicti Novi Monasterii nomine, pro nobis et successoribus nostris futuris abbatibus Novi Monasterii antedicti laudamus, approbamus et ei consensum nostrum impertimur, quanti nostra interest, et assensum. In cujus rei testimonium sigillum nostrum presentibus litteris duximus apponendum. Datum Cluniaci, II idus maii, anno Domini millesimo ducentesimo nonogesimo (sic) nono. (Fragment de sceau)