In nomine Domini. Amen. Per presens publicum instrumentum cunctis evidenter appareat, quod anno Incarnationis ejusdem millesimo trecentesimo, indictione XIII^a, pontificatus sanctissimi patris domini nostri Bonifacii pape octavi anno sexto, vicesima die mensis junii, cum religiosus vir frater Renauldus, Dei paciencia abbas monasterii Balmensis, Bisuntinensis diocesis, Cluniacensis ordinis, vellet resignare et oneri et honori ac administrationi dicti monasterii in spiritualibus et temporalibus cedere et renunciare in presentia mei notarii et testium subscriptorum ad hoc specialiter vocatorum et rogatorum, religiosus vir frater Richardus, prior de Columbario ad Duas Ecclesias, Lingonensis diocesis, frater Jacobus de Sancto Laviano, frater Stephanus de Fertans, monachi Cluniacenses, dixerunt et protestati fuerunt pro domno abbate Cluniacensi in hunc modum: Nos frater Richardus, prior de Columbario, frater Jacobus de Sancto Laviano, et frater Stephanus de Fertans, monachi Cluniacenses, dicimus et protestamus pro domno abbate Cluniacensi quod admissio resignationis et renunciationis quam domnus abbas Balmensis, qui hic est, facere intendit, spectat et spectare debet ad ipsum domnum abbatem Cluniacensem et protestamus quod si idem domnus abbas Balmensis renunciare et resignare velit, hoc perducemus ad noticiam domni abbatis Cluniacensis et super hoc a te Bartholomeo de Gy, clerico, publico auctoritate apostolica notario, petimus fieri publicum instrumentum. Actum in civitate Bisuntina, in monasterio Beate Marie Jusani Monasterii, anno, die, indictione et pontificatu quibus supra, presentibus ibidem religiosis viris fratre Theobaldo priore claustrali, camerario et Johanne dicto Perdesus, monachis Balmensibus, Bartholomeo Varini advocato, Stephano de Haienans notario curie Bisuntine, domno Haymone de Deserto Vilario presbitero, Aubrico de Cornet clerico Bisuntine diocesis, pluribusque aliis fide dignis testibus ad premissa vocatis et rogatis. (Formule et seing du notaire Barthélemy de Gy).