Reverendissimo in Christo patri ac domino carissimo domino Bertrando, divina providentia Clugniacensi abbati, frater Renaudus, decanus Balmensis, totusque conventus ejusdem loci, Bisuntinensis dyocesis, subjectionem, reverenciam et obedientiam tam debitam quam devotam. Cum per liberam resignationem domini Renaudi, quondam abbatis nostri, nostra Balmensis ecclesia pastoris sit solatio destituta, noverit vestra reverenda paternitas, quod nos facimus, constituimus et ordinamus nostrum verum et legitimum procuratorem ac nuncium specialem, venerabilem et religiosum virum dominum Theobaldum, priorem nostrum claustralem, presencium exhibitorem ad petendum a vestra venerabili paternitate vel ab aliquo alio qui loco vestri super hoc habeat potestatem, licenciam abbatem in nostro monasterio eligendi. Supplicantes humiliter et devote sancte paternitati vestre quatinus, si placet, dicto ... priori nostro claustrali vestram potestatem conferre dignemini, ut si quas in nos vel priores nostros interdicti, suspensionis vel excommunicationis tulistis vel ferri fecistis sentencias, loco vestri per ipsum possint revocari et nos munus absolutionis misericorditer obtinere. Ratum et gratum habentes et habituri quicquid in premissis et premissa tangentibus petitum, requisitum, obtentum, actum, gestumve fuerit seu etiam procuratum. In cujus rei testimonium sigilla nostra presentibus litteris duximus apponenda. Datum in nostro Balmensi monasterio, feria sexta post octabas apostolorum Petri et Pauli, anno Domini millesimo tricentesimo. (Traces de deux sceaux)