Nos H[enricus], miseratione divina prime Lugdunensis ecclesie archiepiscopus, notum facimus universis presentes litteras inspecturis, quod cum occasione cujusdam privilegii nobis a Sede apostolica indulti super procurationibus in absencia nostra percipiendis in diocesi et provincia Lugdunensi, procurationes hujusmodi a prioratibus, decanatibus, domibus et locis Cluniacensis ordinis in dictis dyocesi et provincia existentibus peteremus; venerabile patre B[ertrando], abbate Cluniacensi, prioribus, decanis et aliis dictos prioratus, decanatus, domos et loca tenentibus ex adverso se opponentibus et dicentibus se nobis ad procurationes hujusmodi non teneri, cumque eciam a dicto abbate Cluniacensi occasione cujusdam gracie nobis tunc minori officio fungentibus, a Sede apostolica concesse, ut videlicet super fructibus, redditibus et existibus (sic) ecclesie Cluniacensi, anno quolibet, quousque alias nobis esset provisum, quingentas libras Viennenses percipere deberemus a prefato abbate Cluniacensi, saltem pro uno et primo anno dictas quingentas libras peteremus et habere vellemus, eodem abbate Cluniacensi quod pretextu privilegii seu gratie nobis facte, ad solvendas dictas quingintas (sic) libras Viennenses minime tenebatur in contrarium proponente; tandem amicis communibus intervenientibus hinc et inde, cum eodem abbate concordavimus ac etiam pacificavimus in hunc modum: videlicet quod pro predictis procurationibus et pro pensione seu provisione quingentarum librarum predictarum, dictus abbas de voluntate sua donavit nobis et concessit mille et novies centum libras Viennenses nobis seu mandato nostro jam solutas et habitas a dicto domino abbate in pecunia legitime numerata et in utilitate ecclesie nostre Lugdunensis missas totaliter et concessas, et de ipsis nos tenemus totaliter et integre pro pagatis et ipsum dominum abbatem et suos successores, necnon priores, decanos, et alias personas et loca Cluniacensis ordinis in dictis dyocesi et provincia Lugdunensibus existentia de predictis M et IX^c libris Viennensibus pro nobis et successoribus nostris absolvimus perpetuo et quittamus, facientes eidem domino abbati pactum expressum de nichil petendo ulterius super premissis ab eodem vel a suis successoribus quibuscumque vel prioribus, decanis Cluniacensis ordinis, ratione predictorum privilegiorum et gratiarum predictarum, et hanc compositionem, pacem et concordiam ex certa scientia nostra, solutionem et quittationem auctoritate presentium ratificamus ac etiam approbamus, promittentes bona fide et in verbo veritatis per firmam et sollempnem stipulationem et sub obligatione omnium bonorum nostre Lugdunensis ecclesie nos contra predicta seu aliquid de predictis per nos vel per alium, in judicio vel extra, non venturos nec venire volenti contra modo aliquo consenssuros; volentes et concedentes quod si contra modo aliquo veniremus aut venire vellemus, nobis a quocumque in judicio et extra fidem et totalem audientiam denegari. Renunciando ex causa predicta, omni juri ex certa scientia nostra, quoad dictum abbatem, priores, decanos, prioratus, decanatus, domos, loca Cluniac., etc. Quoad alias vero personas non tangentes dictum abbatem, priores, decanos, prioratus, decanatus, domos et loca Cluniacensis ordinis, privilegiis nostris et graciis predictis, nobis et cuilibet predecessori nostro indultis super hoc non renunciamus, sed in solidum retinemus in premissis quantum ad alios qui non sunt de Cluniacensi ordine, ut dictum est, jus nostrum in totum et vigorem privilegiorum nostrorum, declarationes seu interpretationes circa predicta privilegia, gracias et indulgencias pro nobis jam factas seu etiam faciendas. Quittantes insuper et absolventes dictum abbatem, ecclesiam Cluniacensem, priores, domos, prioratus, decanatus, domos et loca Cluniacensia de omnibus et singulis actionibus et petitionibus que nobis et ecclesie Lugdunensi occasione privilegiorum seu gratiarum nobis aut cuicumque predecessori nostro super dictis procurationibus, pensione seu provisione quingentarum librarum et super fructibus supradictis a Sede apostolica indultorum competunt et occasione premissorum possent competere quomodolibet in futurum ... Per hec autem que dicta sunt superius, non volumus nec intendimus nobis aut predicto abbati sueque Cluniacensi ecclesie, prioribus, decanis, prioratibus, decanatibus, domibus, et locis supradictis, in casu consimili prejudicium aliquod generari. Quinimo volumus et concedimus quod si in posterum inter nos et eos casus consimilis evenerit, nobis et ipsis solite maneant libertates, deffensiones, rationes et omnia quelibet et quecumque acsi nunquam compositum, concordatum aut pacificatum inter nos et eos in premissis fuisset. Promittentes bona fide et in verbo veritatis per solempnem stipulationem predicta omnia universa et singula perpetuo et inviolabiliter attendere et servare. In quorum omnium robur et testimonium presentibus litteris sigillum nostrum perpetuum duximus apponendum. Datum et actum in castro nostro Petre Scisse, in estra nova superiori prope magnam aulam nostram novam, die martis post festum translationis beati Nicholai ... anno Domini millesimo trecentesimo, presentibus testibus domino Petro de Arcu, sacrista, magistro Johanne de Petrosa, canonico Sancti Pauli Lugdunensis, fratre Alberto de Gunziaco, infirmario Atthanacensi, domino Stephano de Brolio, capellano nostro dicti archiepiscopi, domino Johanne de Sancto Justo, presbytero, et Petro de Monte Lupello, domini pape publico notario, et Matheo de Nevio, clerico, et quamplurimis aliis ad hoc vocatis et rogatis. Et est sciendum quod super predicta quittatione consimiles littere signate signo magistri Petri de Monte Lupello, publici auctoritate apostolica notarii, eandem quittationem continentes sunt confecte. Datum et actum ut supra.