Supplicatio procuratoris abbatis Balmensis coram diffinitoribus capituli Cluniacensis, qua petit ut, secundum quamdam litteram abbatum Balmensis et Cluniacensis, Balmensis abbas sedem habeat super alios abbates ordinis post Moysiacensem.
Comparente coram diffinitoribus, etc. ... procuratore abbatis et conventus Balmensis monasterii, idem procurator, nomine procuratorio eorumdem, coram diffinitoribus exhibuit quamdam litteram venerabilium patrum, abbatum et conventuum Cluniacensis et Balmensis sigillis sigillatam, in qua inter alias sequens clausula continetur: «Item abbas Balmensis in Cluniacensi ecclesia vel alibi super alios abbates ordinis sedem habebit preter solum Moysiacensem qui est superior.» Quam litteram supplicavit et petiit et alias pluries petierat procurator predictus simpliciter et de plano, modo et forma quibus melius potest per definitores executioni debite demandari et exequendas decerni et quod pactiones, declarationes, et conventiones in dictis litteris contente per domnos abbatem et conventum Cluniacenses eosque quos tangit negocium realiter et efficaciter observent, ad hunc finem quod Balmensis abbas super alios abbates ordinis post Moysiacensem sedem habeat,
sedisque prerogativis letetur secundum dicte littere continentiam et tenorem, salvis nichilominus rationibus, supplicationibus, deffensionibus et aliis juribus abbati et conventui Balmensi competentibus et competituris, contra abbatem et conventum Laxatensem communiter vel divisim, et quemcumque alium qui vellet modo et forma quibuscumque Balmensi monasterio in predictis predicta tangentibus seu predictorum aliquo contraire, salvoque in omnibus jure suo. Addatur et diminuatur prout domnis diffinitoribus videbitur ordinandum.