Charta qua Gauslabertus dat monasterio Cluniacensi, pro anima sua et uxoris suæ Eufemiæ, filiæ Garulfi, coloniam in villa Curt Ruberti.
In nomine summe et individue Trinitatis. Ego Gauslabertus, in articulo mortis positus, reminiscens et vehementer expavescens enormitatem meorum peccaminum, dono Deo et sanctis ejus apostolis Petro et Paulo, ad locum Cluniacum, coloniam quam michi dedit socer meus Garulfus, simul cum filia sua Eufenia, quam michi copulavit in conjugio. Est autem sita in pago Lugdunense, in agro Casnensi, in villa Curt Ruberti, cum omnibus ad ipsam coloniam pertinentibus, campis, pratis, silvis, terris cultis et incultis, egressibus et regressibus, aquis et omnibus consuetudinibus quas ipsa terra debet, sicut mihi dedit jam dictus socer meus Garulfus, ad tenendum et possidendum, totum et integrum, quesitum et inquirendum. Facio autem hanc donationem pro remedio anime mee et uxoris mee Eufeniæ tali conventu, ut pro ista donatione, sicut me, et ipsam uxorem meam recipiant, post mortem ipsius, ad
sepeliendum. Sig. Vuslaberti et uxori sue Eufenie cum filiis eorum. S. Udalrici. S. Guiraldi. S. Vualisfredi. S. Gauceranni. S. Bernardi. S. Otgerii. S. Wicardi. S. Achini.