Charta qua Guirardus, primogenitus comitis Matisconensis, et G., Trenorchiensis abbas, notam faciunt conventionem factam inter Landricum militem et W. de Breisse, præpositum Matisconensem, ex una parte, et ecclesiam Cluniacensem, ex altera, super hominibus de Donziaco.
Ego Guirardus, primogenitus comitis Masticonensis, et dominus Viennæ, et G., Dei patientia Trinorchiensis abbas, universis ad quos præsens pagina pervenerit, salutem in Domino. Notum fieri volumus, quod cum inter dominum Landricum, militem, et præpositum Masticonensem W. de Breisse, et socios eorum, ex una parte, et homines Cluniacensis ecclesiæ de Danziaco, ex altera, orta esset contentio, et in nos compromisissent Cluniacensis abbas pro suis hominibus, dicti vero miles et præpositus cum suis sociis data fide, nos tandem diximus arbitrando, quod omnino quitarent Cluniacensem ecclesiam prædicti impetitores ab omni controversia et querela pro hominibus de Danziaco memoratis et pro omni contentione quæ orta erat tam de præda quam aliis. Ego siquidem G., dominus Viennæ, teneor Cluniacensi ecclesiæ ad hoc quod pax ista inviolabiliter observetur. In hujus rei et pacis testimonium, sigillis nostris præsentem paginam duximus roborandam. Actum anno gratiæ M. CC. XX, in ecclesia Beati Petri Masticonensis.